Hi 我係 OVERKILL 監製兼導演 KELLY，經歷將近 25 小時拍攝 同 9日 瘋狂後期，團隊終於無限接近完成。
導演Kelly 以及MC張天賦 making of
我係OVERKILL另外一位導演KWOKIN，喺今次Production入面我哋仲嘗試同一啲全新嘅夥伴合作。例如有負責置景同道具嘅「東風美術」將我哋腦海入面嘅末日世界接近完美呈現咗出嚟，細緻部分例如MC GANG手中嘅武器同審訊室牆壁質感都距細無遺咁執行晒；另外負責MC Styling嘅「Anson Lau」、第二次合作嘅Stylist「Jansco Wan」同排舞師「Kenya」。各個專業嘅部門將MV嘅內容提高到另一個層次，再次多謝各位拔刀相助。
另外唔可以忘記多謝嘅仲有BLAHBLAHBLAH團隊上上下下嘅每一位。
「喺呢個咁痴線嘅製作入面，同MV末日場景一樣，我地內部都經歷一場場真實嘅衝突。」
作為一隊從來只會盡地一鋪創作嘅CREW，除咗導演組要行得大膽，製作過程嘅每一步都要經過精密計算先可以唔浪費一分一毫嘅人力物力，先可以護住同行嘅同事同MC。同打機一樣，全部都係計算同策略，我深信無一個精彩嘅作品係唔擺心機就可以誕生。
MC張天賦 《Overkill》MV 劇照
「我哋唔單只追求美學，我哋都係追求緊創作嘅科學。」
好開心一直追求嘅Aesthetics可以同MC嘅新歌配合得咁好，我哋都盡力將信任嘅夥伴無條件帶入黎今次創作之中。到底要用MC嘅演技去呈現整個MV嘅Dynamic重要啲定展示跳舞能力重要啲，淨係呢一個點，已經比我們由嘅拍攝前期嘈到而家呢一刻都無停過。即使有人會覺得太執著，做得多咗，但作為呢個MV嘅導演，對於呈現MC嘅形象、態度，以及照顧觀眾視覺享受，畫面節奏，我一樣都唔想放棄。只要有一個位郁咗少少、改咗少少，全部嘢就要重新再嚟過。由影像顏色到後期、空間轉換、CG、甚至跳舞比重，去到交CUT前一刻都廝殺一輪。講到尾都係因為我哋唔想為咗趕工而錯過可以調整嘅時間同進步嘅機會。希望有咩延誤或者不足，大家都會理解。
MC張天賦 《Overkill》MV Dancers
「團隊嘅每次創作都係最後一次，我哋每次都係咁認真做。」
我建構嘅 OVERKILL 末日世界，係想 MC 末日遊戲可以認真玩；即使製作MV嘅部份已經完成，但我哋仲會繼續好似打機組隊咁，用TEAMWORK 繼續 support 呢個MV嘅放送。繼續整合概念、內容，支援翻華納嘅宣傳， support MC 宣傳嘅各樣資訊 同 social media，裡裡外外延續個VIBE，所以 Overkill 嘅遊戲都係啱啱開始﹗希望所有參與嘅人、觀眾、MC，同我地一樣 Enjoy 今次嘅 MV～！
MC張天賦以及《Overkill》MV幕後團隊合照
撰文：Kelly
©️ 2023 BLAHBLAHBLAH。版權所有，未經授權不得轉載或使用。