Edan呂爵安新歌《E先生愛人執照》MV幕後花絮揭露！小編訪問了導演郭健，分享有關製作的故事和採用劍道元素的原因。如果你喜歡呂爵安或對MV幕後花絮有興趣，這篇文章一定要看到最尾！

為什麼選擇劍道作為這次MV拍攝的主題呢？

「榮幸又有機會同Edan合作，拍屬於E先生嘅故事。今次揀劍道呢個元素，除咗係少見嘅拍攝題材，仲因為發現喺打劍嘅過程入面，一定係兩個人對練。而兩個人透過互相掌握節奏，感受對方，識俾人攻擊先識攻擊人。呢種互相探索節奏、時近時遠嘅距離都好似關係入面嘅矇矓感。雖然好似協助拍攝嘅劍道師兄咁講，『你哋拍嘢啫，唔使學得咁認真啦，用返你哋啲效果，飛簷走壁都得』，係嘅，但拍落始終想盡量還原劍道本身，小至點敬禮、點鞠躬都係。比起拍夠交差嘅shot，我哋更加想做到『重現』嘅細節同真實感。」

你說「導演要考牌」是怎樣意思？

「前期構思同練習開始就好似打機咁，未知嘅領域往往係最吸引，會想一路去打去解鎖佢。上個月《ChatMrE》拍完AI、吊威也、拍好團結嘅排球隊，今次就試未拍過嘅雨景、對打戲。實際操作係唔易，例如最後Wide Shot要等10-20分鐘令到成個空間有雨水；拍嘅時候演員又要冒雨hold住表情，同時投放感情互相配合，但感激兩個演員 Edan同Shadow 好用心去學去練，都好感激成個MV團隊嘅肉緊同執着，俾我知道我唔係唯一一個想做好件事嘅痴線佬，你哋每一個都係。」

Edan加入爆肝團隊？

「《E先生愛人執照》作為E先生故事嘅延續，喺同Edan（最了解E先生嘅男人）傾偈嘅過程嘗試了解E先生，行入佢嘅世界，再用影像去呈現返出嚟，一齊諗E先生喺『嗰啲位』會點。而今次同Edan都係個幾緊密嘅合作，由前期構思三次深夜meeting，到後期剪接傾12個鐘，一齊度諗點講故事一齊爆肝。製作呢個『E式浪漫』嘅作品，好有火好熱血！」

作品反應不俗，有說話要跟Edan說嗎？

「睇mon E，謝謝你嘅信任同上心，有機會再玩過！」

小編後記：

導演郭健對MV一些細節執着非常，訪問期間回想時也會眉頭深鎖。在製作過程中，儘管團隊遇到了各種挑戰，最後還是有驚無險地完全了製作。在這裡再次感謝Edan、演員們、Artist Management及Video Production團隊帶來這份高水準的作品。

P.S. 導演要求強行植入廣告：「為咗再有Chur出好作品嘅機會（同資本），歡迎各大尊貴客戶揾我哋拍廣告！」
P.S.2 「感謝廣告客戶支持，我哋平時開會都淨係飲藍妹！」